الرئيسية
التسجيل
دخـــول
خواطر كاتب بحريني
بعض الرياييل الله يهديهم ويهديني معاهم في الشارع في المجمعات بكل مكان عام يقعدون يتحككون جدام الناس ولا همهم شي. يا اخي روح الحمام (عزكم الله) وتحكك لين اتقول بس. عاد جذيه جدام الأوادم والحريم عيب. وياريت بعد على الطاير لااااا ياخذ له 5 دقايق ورايح ولا يدري بالدنيا. والمصيبة الأكبر ان بعض الحريم ياتهم العدوى. الظاهر عبالهم شي حضاري هالسالفة عاد مايعوقون يقلدون وياحبهم للتقليد. من اليوم وساير كل واحد يتسبح قبل مايطلع من بيتهم مب ناقصين فضايح!
دكاترتنا ربي يحفظهم ماتم شي ماقالوا يسبب السرطان بعيد الشر عنكم. الطماط، البيبسي، الخس، البقل. البصل، التكة، الباجة. ماخلوا لنا شي ناكله. حتى البيض والطماط الي اهي الأكلة الشعبية رقم واحد في البحرين بعد قالوا اتسبب امراض. يعني بالله عليكم شناكل. ماي مفيوح؟ والغريب ان الدخاتر ياكلون كل شي من صوب وينصحون الأوادم من صوب ثاني. حتى الجقاير نصهم يدخنون ولا عاد ذاك المصري الطويل مال طوارئ السلمانية يجوف له مريض قد 5 دقايق ويطلع يدخن ربع ساعة. لا ومايعطي اجازات نفسه خايسة ربي يهديه!
مادري شسالفة الأحكام هالأيام. واحد بايق تليفون حاكمين عليه 6 اشهر سجن. او واحد بايق مليون محكوم عليه اسبوعين سجن مع وقف التنفيذ. واحد عزكم الله تافل بويه شرطي اثناء اداء الواجب يحكمون عليه بـ 20 دينار غرامة. او واحد سب موظف عام يحكمون عليه بسجن شهرين مع غرامة 500 دينار. والي عاد مصخها الي حكم بتعويض حق واحد قصوا ريله الصاحية وخلوا له الخرابة. بـ 2000 دينار. من صجهم والا يتغشمرون مادري. كل واحد وعلى هواه ومزاجه الله يعين الي بيدخل على واحد رافسته مرته من الصبح. سيدة اعدام. آخر القضايا، واحد ذبح قطوة طلع براءة لأن القطوة عضته. او واحد داس على زهيوي. غرموه 300 دينار وحبس شهر لأن لزهيوي مادش البيت وكان في طريج عام. التسعيرات:
1. ضرب شرطي مع عاهات مستديمة: 30 دينار. ياعيني
2. البصق على الشرطي: 20 دينار. بلاش والله
3. رفس الشرطي: تنبيه وأخذ تعهد. يا حلاوه
4. قتل شرطي: براءة. وبيت اسكان هدية. شي شي (تبون امن وامان بعد)
5. رفع الصوت على القاضي: الأعدام شنقا ثلاث مرات ونص!
واحد من الأخوان يقولي سالفة يدته ربي يطول لنا بعمرها. يقول دشت علي ذاك اليوم والا اتقولي يمه ابي اتسويلي اشتراك حق الترترنت. قال لها شنو؟ قالت له الترترنت. قال لها مافهمت يمه. قالت له ذي الي يدشونه في الكمبيوتر. قال لها أي انترنت. قالت له أي. قال لها ان شاء الله. سوى لها عقب ماطحنت عليه. والا يايه تتمخطر اتقوله تعال علمني شلون يدشون الشورت. يعني الشات. قال لها يمه من صجج الا اتقوله أي شفيها بدال ما انا قاعدة طول يومي مجابلة لطوف خلني اجوف الأوادم يسولفون. علمها وتمت اتدش. تكتب السلام وبس تقعد تتقهوى واتجوف السوالف. ساعات يسمعها اتقول وييييييييييييه وعليه. وساعات تضحك. وساعات اتقول سود الله ويهك. الظاهر احد مطرش لها رسالة خاصة. قام اخونا تسحلب من وراها يبي يعرف نكها عشان يغربلها. طلع نكها ذبانة مجروحة. وسوت لها ربع وعلى قولتها شلة تسهر معاهم من عقب ماكانت مجابلة السيادة والصلاة ليل نهار. وصارت ترقد لي الظهر. سبحان الله هالأنترنت والشات سوى بلاوي في اليهال. والحين دور العيايز. يمكن بعد عقب سنة اتصير هاليدة هكر من يدري!
» كيفية ترميم الغضاريف
» الــــوقــت قـــــــاســي يـــــودع مـــــنــــتـــدى الــــحـــــضـــــن
» كيف نربي ابناءنا على الصلاة
» الملكــــــ فيصل(رحمه الله
» ابيا ت شعريه
» اعلان عن فتح باب القبول بوحدات المظليين وقوات الامن الخاصة ابتداء من 21/12/1431
» أكاذيب الصغار.. كيف نتعامل معها؟
» لكل مسلم يُريد الأجر بأقل جهد